Gjykata Kushtetuese do të vijojë të mbetet pa kryetar, të paktën deri më 20 shkurt, ditën kur do të zhvillohet raundi i tretë për zgjedhjen e tij.
Në raundin e dytë që u zhvillua këtë të premte, asnjë prej tre kandidateve në garë nuk arriti që të marrë shumicën e votave, në mënyrë që një prej tyre të përzgjidhej kryetare.
Në përfundim të procesit të votimit pas mbledhjes së gjyqtarëve të Kushtetueses, sërish asnjë nga kandidatet nuk mori shumicën ligjore prej të paktën 5 votash.
Rezultati i votimit:
-Fiona Papajorgji – 3 vota
-Marjana Semini – 3 vota
-Holta Zaçaj – 3 vota
Kryetari/Kryetarja i/e Gjykatës Kushtetuese zgjidhet me votim të fshehtë, me shumicën e votave të të gjithë gjyqtarëve të Gjykatës Kushtuese, për një periudhë 3-vjeçare me të drejtë rizgjedhjeje vetëm një herë.
Seanca për zgjedhjen e Kryetarit drejtohet nga gjyqtari më i vjetër në detyrë. Në rast se ka më shumë se një kandidat dhe gjatë votimit asnjëri prej tyre nuk merr shumicën e parashikuar të votave, bëhet një votim i ri dhe, pas këtij, vijohet me votimin mes kandidatëve që kanë marrë numrin më të madh të votave.
Në përfundim të këtij votimi shpallet i zgjedhur kandidati që ka marrë shumicën e votave. Në rast se asnjë nga kandidatët nuk ka marrë shumicën e votave ose votat janë ndarë në mënyrë të barabartë, Kryetari caktohet me short. Procedura e zhvillimit të shortit parashikohet me vendim të Mbledhjes së Gjyqtarëve. Kryetari i zgjedhur njofton Presidentin e Republikës dhe Kryetarin e Kuvendit.
