Ish-ministri i Drejtësisë, Ylli Manjani thotë se çështja e 21 janarit, po përdoret në mënyrë të ndyrë dhe të neveritshme nga politika.
Në një intervistë për Euronews Albania, Manjani u shpreh se kjo është kthyer në një teatër dhe lojë politike, ndaj nuk meriton shumë vëmendje.
“Ajo që mbetet për të komentuar në këtë rast, është përdorimi politik i kësaj ngjarjeje. Një përdorim i tejzgjatur, i neveritshëm do të thoja. Çdo vit bëhet e njëjta skenë, i njëjti teatër që luhet fatkeqësisht dhe mjerisht në mënyrën më të mirë të mundshme nga politika. Sigurisht, ngatërrimi me punën e drejtësisë, është një lojë e ndyrë. Realisht, nuk meriton shumë vëmendje. E gjithë historia e 21 janarit që përsëritet çdo janar, është një lojë politike”, theksoi ai.
