Në ditën e nëntë pas tërmetit, numri i viktimave nga dy tërmetet që goditën Turqinë të hënën e kaluar është rritur frikshëm duke kaluar në mbi 37.000 ndërsa mbi 90 mijë persona kanë mbetur të plagosur.
Situata në të dy anët e kufirit turko-sirian paraqitet e rëndë, ndërsa lajmet për të mbijetuar sa vinë e zbehen. Edhe pse numri i ndihmave është i madh ende mbetet i pamjaftueshëm për shkak të numri të madh të të pastrehëve si pasojë e tërmetit.
Sakaq, gazetarja Aida Topalli e cila gjendet në Hatay ka raportuar për MCN, se nga tërmeti tragjik kanë mbetur të vdekur edhe 73 shqiptarë.
“Më duhet të them se situata këtu në Hatay është shumë katastrofike, ishte e pabesueshme ajo që po shihja si fillim, vetëm ndërtesa të rrënuara, të shembura, dhe njerëz që kanë mbetur pa strehë. Për ekipet e kërkim-shpëtimit, puna sa vjen e bëhet më e vështirë për të shpëtuar trupa nën rrënoja dhe shpresa për t’i gjetur ata vështirësohet. Po ashtu rreziku për përhapjen e sëmundjeve shtohet se ka ende njerëz nën rrënoja”, tha gazetarja.
Sipas Topallit vështirësi më e madhe që po haset është identifikimi i viktimave dhe varrosja e tyre, aq sa qeveria dhe autoritetet lokale po i vendosin të vdekurit në varre masive.
“Varret masive janë aq shumë sa që dje kemi partë të vendosin afër të varrosurve rrobat e tyre që i kanë pasur veshur, sepse është e vështirë të identifikohen, shumë prej tyre nuk janë identifikuar ende. Sot ndërkaq shifrat e shqiptarëve që janë regjistruar të vdekur kanë arritur në 73, dhe dua të shpreh solidaritetin me këto familje që kanë humbur të dashurit e tyre. Do të zhvendosem në ditët në vijim te zonat ku ka shqiptarë për të parë përjetimet nga atje”, u shpreh Topalli.
