Një shpërthim me eksploziv ka tronditur qytetin e Sarandës, mëngjesin e sotëm ku është rrafshuar me lëndë plasëse një prej hoteleve më të vjetra që ndodhej shumë pranë shëtitores.
Bëhet fjalë për hotel ‘Bizanti’ që ka 3 bashkëpronarë, Dhimitër Evangjeliu, Spiro Çabiri dhe Vangjel Shtuka.
Shpërthimi me lëndë plasëse nga autorë ende të paidentifikuar ka shkaktuar dëme të mëdha në fasadat e dhjetëra bizneseve dhe qindra banesave përreth deri në 300 metra largësi, ndërsa mësohet se sasia e eksplozivit ka qënë rreth 30 kg.
Më herët janë publikuar dhe pamjet nga shpërthimi, teksa shihen dhe pasojat që janë shkaktuar në banesat përreth.
Ndërsa fatmirësisht nga shperthimi nuk janë raportuar dëme në njerëz.
Dëshmitë e banorëve
Banorët pranë zonës ku ndodhi edhe shpërthimi i fuqishëm i hotelit me tritol, kanë treguar për mediat ndjesitë e tyre.
Banorët thanë se shpërthimi ishte shumë i madh ndërsa një banor tha se për një moment kishte menduar se pallati ku jetonte po fundosej në tokë.
“Thashë se u fundos pallati në tokë. Isha zgjuar dhe po rrija. Nuk mbledhim dot veten. Tërmet nuk e mendova por dukej se ishte shpërthim. U cova menjeherë, hapa ballkonin dhe thashë të hidhesha nga ballkoni.
Ishte shumë i madh, thamë se gjëmoi”– janë shprehur banorët pranë zonës ku ndodhi shpërthimi.
Çfarë njofton policia?
Blutë në reagimin e tyre mbi ngjarjen kanë bërë me dije se, prej vitit 2002 bashkëpronarët janë në një proces gjyqësor për pronësinë me palë paditëse Dhimitër Evangjeliu dhe të paditur Spiro Çabiri dhe Vangjel Shtuka.
Ndërkohë këta dy të fundit rezultojnë në QKB si bashkëpronarë të hotelit dhe me administratore Miranda Çabiri.
Ndërsa janë shoqëruar disa persona që mund të kenë dijeni për ngjarjen. Mes tyre edhe djali i Spiro Çabirit, ku sipas burimeve paraprake i kanë bllokuar edhe makinën.
Ndërkohë është ngritur një grup i posaçëm hetimor, për zbardhjen e plotë të ngjarjes.
