Protestë pa afat është kërkesa që kanë artikuluar shumë prej pjesëmarrësve nga sheshi para kryeministrisë, ku ka nisur grumbullimi i qytetarëve.
Kryetari i PD-së, Sali Berisha lajmëroi disa ditë më parë zhvillimin e një protestë kombëtare para zyrës së Edi Ramës, duke nisur nga mesdita e kësaj të Shtune. Protesta vjen pas denoncimeve të shumta të opozitës për lidhjet e dyshimta të kryeministrit Edi Rama me ish-shefin e FBI-së në Nju Jork, Charles Mcgonigal. Zëra të spikatur të opozitës kanë paralajmëruar një protestë me pjesëmarrje rekord.
Në sheshin para kryeministrisë, për mediat, qytetarë të shumtë kanë kërkuar që protesta të vijojnë pa ndalim deri në dorëheqjen e Edi Ramës si kryeministër.
“Ne nuk ikim, kemi ardhur të përgatitur. Do rrimë një javë, dy javë. Nëse na tradhton Sala thotë ‘do ikim, do ikim dhe nuk vijmë më këtu’”, tha një qytetar.
“Nuk iki në shtëpi. Për ça të iki. Vetë, presh kam në shtëpi”, u shpreh një tjetër protestues.
Arsyet që kanë renditur pse kanë dalë në protestë lidhen kryesisht me ekonominë.
Gjatë protestues së sotme, pritet që të mbahen fjalime si edhe në tubimet e mëparshme. Kohëzgjatja e protestës nuk është përcaktuar qartë nga Partia Demokratike, që është dhe organizatori.
Nga ana tjetër, më shumë se një mijë efektivë policie ndodhen në terren, ndërkohë që tashmë është formuar edhe një kordon para kryeministrisë. Po ashtu, dyert e zyrës së shefit të qeverisë janë fortifikuar, ndërsa shtyllat janë lyer me graso në mënyrë që protestuesit mos të prekin kamerat e instaluara aty.
Po ashtu, punonjës policie janë vendosur në lartësi tarracën e Kryesisë së Kuvendit për survejim. Forca të shumta janë vendosur po ashtu pranë kryeministrisë.
