Konsumimi i kanabisit në publik do të ndalohet në lagjet me dritat e kuqe të Amsterdamit nga mesi i majit. Ligjet synojnë të përmirësojnë jetesën për banorët të cilët kohët e fundit kanë ngritur ankesa lidhur me turistët të cilët vizitojnë këto lagje. Gjithashtu lagjet me dritat e kuqe do të jenë të detyruar që të mbyllin dyert në orën 3 të mëngjesit.
Mediat lokale raportuan se pothuajse të gjithë këshilltarët mbështetën marrjen e masave për të reduktuar shqetësimin për banorët. Këshilli i qytetit njoftoi gjithashtu se restorantet dhe baret do të duhet të mbyllen deri në orën 2 të mëngjesit të premteve dhe të shtunave dhe asnjë vizitor i ri nuk do të lejohet në qytet pas orës 1 të mëngjesit.
Aktualisht, shitja e alkoolit nga dyqanet e pijeve alkoolike dhe kafenetë në lagjen e dritave të kuqe është e paligjshme nga e enjtja deri të dielën pas orës 16:00. Këshilli do t’u kërkojë shitësve që të heqin plotësisht alkoolin nga vitrinat e tyre gjatë asaj kohe. Vitin e kaluar, rreth 18 milionë turistë u kthyen në Amsterdam pas heqjes së kufizimeve Covid 19.
Amsterdami është i njohur për kafenetë e tij dhe konsumimin e kanabisit si dhe tërheq miliona turistë në vit. Por abuzimi me drogën dhe alkoolin po rrit shkallën e krimit duke ngritur shqetësime nga banorët vendas. Sipas ligjeve aktuale në Holandë, posedimi, prodhimi ose tregtimi i drogës është vepër penale.
Ndërsa është e paligjshme të shesësh ose posedosh drogë, Holanda ka një “politikë tolerimi” që lejon kafenetë të shesin kanabis nën kushte strikte. Një nga këto kushte përfshin që dyqanet të mos shkaktojnë shqetësime. Përveç ligjeve të reja, këshilli i Amsterdamit do të nisë në pranverë një fushatë me sloganin “Qëndroni larg” duke synuar turistët që udhëtojnë në kryeqytet për qëllime droge, alkooli dhe seksi.
