Mungesë të ngrohjes në shkolla, siç kanë treguar nxënësit e prindërit, janë shfaqur në shumë zona të vendit. Përballimi i motit të ftohtë pa ngrohje është bërë e vështirë për nxënësit, ndërsa nga disa drejtori arsimore është urdhëruar shkurtimi i orëve të mësimit.
Deputetja e Partisë së Lirisë, Erisa Xhixho ka reaguar për këtë situatën e shkollave, në kushtet e temperaturave të ulëta.
Në një postim në Facebook, Xhixho thotë se në të vërtetë 90% e shkollave në rang vendi janë pa sistem për ngrohje. Sipas saj, kjo situatë është e papranueshme dhe në mungesë totale të përëgjegjshmërisë nga ana e Minitrisë së Arsimit.
“Si çdo vit, shkollat e vendit gjenden në kushte të mjerueshme, pa infrasrukturën e duhur për të përballuar temperaturat e ulëta. Nxënësit bëjnë mësim me xhupa dhe dorashka, pamje që rrëzojnë propagandën e shkollave digitale. Në të gjithë vendin raportohet për 100 shkolla pa ngrohje. Por realisht janë 90% e shkollave pa sistem ngrohjeje në rang vendi Kjo problematikë që na shoqëron prej vitesh ka mbetur pa zgjidhje, sepse kjo qeveri nuk i ka prioritet investimet në arsim.
Është e papranueshme dhe mungesë totale e përgjegjshmërisë nga ana e Ministrisë së Arsimit dhe bashkive të Rilindjes t’i lënë fëmijët tanë në klasa të ftohta, pa kushtet minimale, e më pas të dalin të na flasin për standarte të sistemit arsimor”, shkruan Xhixho.
Xhixho shton se paratë janë, mjafton vullneti për të ndarë me qytetarët plot 500 milionë euro që arkëtoi buxheti i shtetit nga rritja e çmimeve.
“Cilësia në arsim është një nga shumë shkaqet pse familje të tëra vendosin të largohen nga vendi. Vetëm për periudhën 2014-2022, sipas Eurostat, janë larguar 935 mijë familje. I bëj thirrje Ministrisë Arsimit të marrë përsipër përgjegjësitë që ka dhe të japë zgjidhje, jo deklarata boshe. Gjithashtu sa më parë të miratojmë në Parlament shtesë në buxhetin për vitin 2023 për arsimin, për pajisjen me sistem ngrohjeje të çdo shkolle në vend. Lekët janë aty, mjafton të ndërprisni pagesat e inceneratorëve që nuk ekzistojnë. Paratë janë, mjafton vullneti për të ndarë me qytetarët plot 500 milionë euro që arkëtoi buxheti i shtetit nga rritja e çmimeve.”, përfundon Xhixho.
