Një 42-vjeçar gjeorgjian i shpallur në kërkim ndërkombëtar është arrestuar në Tiranë.
Burime zyrtare nga policia konfirmuan këtë të Martë se në pranga u vu Mindia Lavasogli, 42 vjeç, i cili fshihej në Tiranë dhe përdorte pasaportë false, me emrin e një shtetasi ukrainas.
“Mindia Lavasogli (Goradze) strehohej në Tiranë, dhe akuzohet si kreu i një grupi kriminal të dhunshëm, me aktivitet kryesisht në krimet kundër pasurisë, në Gjeorgji dhe në vende të tjera. Gjykata e Kutaisi-t, Gjeorgji, me vendimin nr. 1/532-16, të datës 20.06.2018, e ka dënuar këtë shtetas, me 12 vjet burgim, për veprat penale ‘Pengimi i veprimtarisë profesionale të gazetarit, kryer me anë të kanosjes’, ‘Grupi kriminal’, etj”, njofton policia.
Arrestimi i tij është bërë me qëllim ekstradimin drejt Gjeorgjisë.
