Duke mos u privuar aspak nga përgatitjet për protestën e 11 shkurtit, që e ka cilësuar nisje të një revolucioni pa kthim, kreu i Partisë Demokratike Sali Berisha ka kërkuar nga demokratët dhe kryesisht qytetarët e Tiranës që të protestojnë edhe me 8 shkurt para Parlamentit.
Kërkesa e Berishës përkon me seancën plenare të së mërkurës në Kuvend, ku PD do t’i drejtojë 13 pyetje kryeministrit Edi Rama në lidhje me aferën McGonigal dhe lobimin e tij 225 mijë euro për të asgjësuar opozitën përmes korruptimit të ish-zyrtarit të FBI.
Nisur edhe nga fakti se disa deputetë socialistë kanë paraqitur në Këshillin e Etikës në Kuvend kërkesë për të përjashtuar 8 deputetë të PD, që sipas tyre bllokuan foltoren në seancën e shkuar, Berisha kërkon që asgjë të mos bëhet e thjeshtë për “regjimin” e Ramës.
“Të mërkurën në orën 10:00, Rama ka urdhëruar Lindën e Parlamentit të përjashtojë 8 deputetë, kur ne kemi seancën e pyetjeve për McGonigalin, që ta marrin vesh shqiptarët. T’ua shpjegojmë shqiptarëve të gjitha. Pasnesër në orën 10:00, sepse opozita sakrificë është, ne e kemi thirrur atë në Parlament. Ftoj qytetarët e Tiranës që të vijnë aty jashtë Parlamentit. Të jenë aty. Të thonë zërin e tyre. Nuk mund t’i lihet Parlamenti një krimineli si ai. Ai e dinte se ishte një kriminel se çdo kriminel tjetër në vend”, tha Berisha.
Sa i përket protestës së paralajmëruar në 11 shkurt, Berisha tha se duhet të bëhet gjithçka që të jetë protesta më e madhe që ka njohur vendi, ndërsa shtoi se ky është një revolucion dhe zinxhiri i protestave do vijojë.
“Me votën jemi korrekt, nuk preket vota. Data 11 është sipari i një revolucioni, që do të ndalet vetëm me përmbysjen e Edi Ramës”, është shprehur Berisha.
Më herët gjatë ditës, Berisha në një takim me kandidatët e PD për zgjedhjet lokale të 14 majit e cilësoi u ndal gjatë te afera McGonigal, duke e cilësuar thikë pas shpine që Rama i nguli NATO-s dhe SHBA-ve.
“Kryeministri ynë shkon dhe blen njeriun më kryesor në agjencitë e zbulimit për sigurinë e SHBA-së. Ka krijuar një skandal jashtë imagjinatës. Ai ndrydhet në Surrel dhe përpiqet ta kalojë. Është e pakalueshme. Çdo ditë mediat e mëdha amerikane trajtojnë këtë akt të turpshëm. Këtë akt të papërgjegjshëm. Në fushën e sigurisë, i futi thikë pas shpine SHBA-së. Nëse ju fut thikë pas shpine SHBA-së, që janë përgjegjës për mbrojtjen e vendeve të lira, këtë akt e ke kryer ndaj NATO-s dhe ndaj vendeve të lira”, tha Berisha.
Lideri opozitar nuk u ndal me kaq, por zbërtheu në detaje atë që e quajti strategji të Ramës për të shkatërruar Partinë Demokratike, duke përdorur lobingun në Amerikë nëpërmjet McGonigal dhe shpikjen e çështjes së financimeve ruse me Muzin, por edhe “marrjen peng” falë saj të ish-kryedemokratit Lulzim Basha.
“Rama nuk duhet ta priste McGonigal me ish-agjentë të Sigurimit të Shtetit, por ta priste me të gjithë ekipin e sigurisë kombëtare, por nuk e bëri, sepse e donte si asset personal. Nuk mund të sillet një kryeministër i një vendi partner, ndaj një kombi që i detyrohemi më shumë se kujtdo tjetër. Imagjinoni që vendi i madh i lirisë, që rrezaton vlera në mbarë botën, imagjinoni ju që janë angazhuar për të shkatërruar një forcë politike në vend. Padiskutim që këta njerëz nuk përfaqësonin SHBA-të, por përfaqësonin Edi Ramën. Imagjinoni ju që këtë gjë donin t’ja bënin PD-së, që edhe po të kishte ndonjë financim rus, hetimi duhet të bëhej transparent, por jo të merrej peng PD. Ndërkohë Rama i hap dosje për pastrim parashë Lulzim Bashës. Ja mbylli dosjen, nuk e çoi në Gjykatë të Lartë, duke i thënë, tani unë të kam në dorë ty, ke 6 vite burg minimum. E futi në xhep atë. As sot nuk thotë, mori apo nuk mori para ruse”, tha Berisha.
