Ambasadori shqiptar në Turqi, Kastriot Robo deklaron se deri më tani nuk raportohet për shqiptarë në mesin e viktimave nga tërmeti i fuqishëm që goditi këtë vend gjatë natës.
“Fatmirësisht në zonën e Ankarasë nuk u ndje. Ne, stafi i ambasadës, i Konsullatës shqiptare jemi mirë dhe të sigurt. Ishte tërmet shkatërrues, përveç fuqisë së madhe, zgjati shumë në kohë. Kam komunikuar menjëherë pasi ndodhi tërmeti, me shtetas turq, me kombësi shqiptare. Fatmirësisht nuk ka humbje njerëzit për komunitetin shqiptar që jeton në ato zona. Prezenca e shqiptarëve në ato zona është e limituar, krahasuar me zona të tjera. Kemi komunikim permanent. Nuk rezulton se ka problem deri tani”, tha ambasadori shqiptar në një lidhje telefonike për News 24.
Robo deklaron se tërmeti mund të ketë akoma efekt shkatërrues, ndërsa shtoi se ambasada jonë atje ka vënë në dispozicion një numër emergjence për shqiptarët në nevojë.
“Mund të ketë akoma efekte shkatërruese ne jemi në lidhje me ministrinë e Brendshme të Turqisë duke u interesuar për shtetasit tanë por deri tani nuk na rezulton por vetë ministria po përpunon të dhënat për të nxjerrë emrat e viktimave, ne kemi vënë dhe një numër emergjence për shqiptarët që kanë nevojë për mbështetje”, shtoi ai.
