Ashtu siç kishte paralajmëruar që në nisje të vitit të ri dhe i shtyrë edhe më tepër prej shpërthimit të skandalit të korruptimit të zyrtarit të FBI-së, Charles McGonigal nga kryeministri shqiptar Edi Rama, kreu i PD Sali Berisha shpalli ditën e djeshme datën e protestës së radhës së opozitës.
PD, PL, aleatët dhe shoqëria civile priten të mbushin sheshet në tubimin e 11 shkurtit për të kërkuar dorëheqjen e kryeministrit Edi Rama dhe në selinë blu nuk kanë humbur aspak kohë, por kanë filluar nga puna për mobilizimin e strukturave dhe qytetarëve.
Sali Berisha ka thirrur sot në orën 13:00 një mbledhje të Grupit Parlamentar, ku fokusi i diskutimit do të jetë qasja që PD pritet të ketë për këtë protestë.
“Beteja finale” ndaj regjimit të Ramës, siç Berisha e ka cilësuar tubimin, pritet që të analizohet deri në detaje në mbledhjen e sotme, ndërsa lideri opozitar do të njohë deputetët me vendimet e marra.
Për përgatitjen e hapave të radhës, kryetari i PD-së pati një takim edhe me aleatin e tij Ilir Meta në fillim të kësaj jave, me kreun e Partisë së Lirisë që në dalje nga selia blu vendosi theksin te zhvillimi i protestave.
