Skandali “McGonigal” prej ditësh është kryefjala e debatit politik mes mazhorancës dhe opozitës e cila kërkon që kryeministri Edi Rama të dalë e të japë “llogari” për dosjen amerikane që e lidh atë me korruptimin e ish-zyrtarit të FBI-së i cili ka rënë në pranga.
Deputeti demokrat Ferdinand Xhaferri ka pyetur nëse Niko Peleshi apo drejtori i policisë është takuar me McGonigal, i cili u angazhua që përmes pagesave të lobonte kundër opozitës shqiptare.
Megjithëse McGonigal akuzohet për korrupsion në vlerën e 220 mijë dollarëve, Peleshi nuk heziton të përgjigjet se në rast se do e kishte takuar për të nuk do ishte ndonjë mëkat i madh.
Pjesë nga biseda:
Xhaferri: E keni takuar McGonigal ju apo drejtori i policisë?
Peleshi: Do përgjigjem se po nuk u përgjigja do duket sikur kemi ndonjë gjë për të fshehur.
Xhaferri: Kur vjen një zyrtar i lartë i FBI takon kreun e SHISH, drejtorin e Policisë, kreun e SPAK, ai nuk takon vetëm kryeministrin, prandaj ju pyeta.
Peleshi: Së pari ju mund të dilni se nuk e përcaktoj unë dot hapësirën se ku duhet të diskutoni ju. Mund të bëni pyetje jashtë temës. Unë kam ardhur si ministri i Mbrojtjes ndërsa drejtori i Agjencisë i Mbrojtjes Civile ka ardhur si i tillë, jo si ish funksionar. Pyetja juaj ishte e drejtpërdrejtë. Jo nuk e kam takuar, nuk e di drejtori. Por edhe po ta kisha takuar unë personalisht nuk besoj se bën lajm. Ne kur takojmë dikë nuk mund të shtiem fall dhe të parashikojmë që nuk do kenë shkelje apo akuzë nga vendet e tyre. Kjo nuk është pyetje. Unë nuk merrem e spekulime. Edhe po ta kisha takuar nuk do ishte ndonjë mëkat.
