Kreu i Partisë Demokratike, Sali Berisha ka konfirmuar se opozita e bashkuar do të marrë pjesë në zgjedhjet lokale të 14 majit.
Gjatë një deklarate për mediat nga selia blu, Berisha tha se Edi Rama meriton të futet në burg për shkak se ka shkaktuar një dëm të pariparueshëm të marrëdhënieve mes Shqipërisë dhe SHBA-së, për shkak të implikimit të tij në aferën “McGonigal”.
“KQZ njeh vetëm vendimin e 25 marsit 2022, nëse zbaton porositë politike të një njeriu që meriton të jetë në burg për aktin korruptiv, për dëmin e marrëdhënieve Shqipëri-SHBA dhe ju garantoj juve se për 2 ose më shumë dekada, dëmi nuk riparohet. SHBA e pret këtë akt nga Koreja, Mianmari, Putin e Lukashenko e jo nga një vend anëtar i NATO. Shqiptar, përbuzeni këtë njeri pa moral”, tha Berisha.
I pyetur nga gazetarët se si do të garojë PD e drejtuar prej tij, nëse KQZ nuk e njeh si Parti Demokratike, ai tha: “Edhe nëse ndodh kjo ne do të marrim pjesë në zgjedhje pavarësisht manovrave të Edi Ramës. Por duhet njohur vendimi i plotë i gjykatës së 25 marsit”.
