Skandali me korruptimin e ish-zyrtarit të FBI-së, Charles McGanigal dhe “fshehja” e kryeministrit Edi Rama duke mos guxuar të dalë përballë opozitës për të sqaruar nivelin e përfshirjes së tij në këtë aferë amerikano-shqiptaro-ruse, për kreun e PD, Sali Berisha është e patolerueshme.
Në një deklaratë urgjente për mediat dhënë mbrëmjen e sotme nga selia blu, Berisha ka ripërsiëritur kërkesën e tij në drejtim të Edi Ramës për të dhënë dorëheqjen pasi ka paguar për të asgjësuar opozitën shqiptare.
“Jam sot këtu para jush, për të kërkuar largimin e menjëhershëm, dorëheqjen e menjëhershme të Edi Ramës nga detyra e kryeministrit. Jam sonte këtu për të deklaruar, se për Partinë Demokratike, popullin opozitar, ky objektiv është absolut dhe i panegociueshëm. Prevalon, mbizotëron mbi çdo gjë tjetër, pa largimin e këtij armiku të egër të lirisë, identitetit dhe interesit të shqiptarëve, nuk ka dhe nuk mund të ketë asnjë zhvillim tjetër. Demokratet dhe demokratët kudo që janë, në Shqipëri dhe jashtë saj, duhet të mobilizohen për betejën finale me këtë kalbësirë, me këtë monstër, me këtë demon të pushtetit”, tha Berisha.
I pyetur nëse do të thërrasë protesta për të kërkuar largimin e kryeministrit, Berisha tha se dorëheqja e Ramës do të kërkohet me të gjitha mënyrat, duke mos përjashtuar protestat.
“Me të gjitha mjetet e mosbindjes civile kjo kalbësirë do të shporret nga pushteti. Nuk mund të mbahet më. Ka kryer aktet më makabre, më të rënda. Kjo është beteja finale, absolutisht Shqipëria paqe, nuk do të mund të ketë më pa largimin e kësaj kalbësire. Ka përdorur paratë, shërbimet, kontraktuar njëshin e kundërzbulimit të FBI për t’i futur thikën PD dhe për ta nxjerrë nga skena politike. PD do t’i japë atij reston. Çdo demokrat është para alternativës të ekzistencës apo jo të PD, të mbrojtjes së saj me çdo çmim dhe kjo nënkupton largimin e Ramës. Shqipëria nis betejën finale kundër këtij armiku. Duhet të shkulim, të përmbysim, të heqim një minutë e më parë këtë kalbësirë nga maja e ekzekutivit shqiptar”, nënvizoi Berisha.
Ndër të tjera lideri i opozitës tha se çdo ditë nga sot do të jetë “Parlament” për opozitën shqiptare deri në momentin që të rrëzojë Edi Ramën nga pushteti, pasi me të kryeministër qeverinë e kontrollon oligarku rus Oleg Deripaska.
“Nuk ka më Parlament. E patë sot. Parlamenti do të jetë çdo ditë deri në largimin e Edi Ramës., Largimi i Edi Ramës është objektivi kryesor i Partisë Demokratike dhe opozitës. Parlamenti është i Deripaska për sa kohë Edi Rama të jetë në krye të ekzekutivit. Kjo është një beteje për jetë a vdekje për demokracinë”, theksoi Berisha.
