Janë zbardhur detaje të reja, nga plagosja e 40-vjeçarit Eder Dorzi, në rrugën Vaso Pasha, në Tiranë.
Policia bën me dije se është arrestuar një nga autorët e ngjarjes, konkretisht shtetasi Maren Hoxha, 27- vjeç, ndërsa vazhdon të jetë në kërkim Eridon Hasa.
“27-vjeçari, ishte shpallur në kërkim pasi me datë 21 janar, në rrugën “Vaso Pasha”, në një lokal, në bashkëpunim me shtetasin E. H., (aktualisht në kërkim), kanë goditur me mjet prerës shtetasin E. D”- njofton policia.
Materialet i kaluan Prokurorisë, për veprime të mëtejshme procedurale.
Si ndodhi ngjarja?
Eder Dorzi është plagosur me thikë 27 herë tre ditë më parë. Ngjarja ka ndodhur rreth orës 12:00 të drekës të së shtunës, ku 41-vjeçari Dorzi është qëlluar disa herë me thikë. 41-vjeçari ndodhet në spitalin e Traumës në gjendje kritike dhe sipas familjarëve ka 27 plagë në trup të shkaktuara nga goditjet me thikë dhe rrezikon që të paralizohet, pasi nuk i lëviz dot këmbët dhe duart.
Familjarët kanë bërë kallëzim në komisariatin 2 të policisë, janë dhënë deklaratat në polici. Sipas të plagosurit dy persona i janë afruar në tavolinë si miq dhe më pas e kanë qëlluar me thikë. Ende nuk dihen shkaqet e konfliktit dhe 41 vjeçari deklaron se nuk ka konflikt me njeri.
