Djali i kryetarit të Partisë Demokratike, Sali Berishës, Shkëlzen Berisha është paraqitur ditën e sotme në SPAK me një dosje në duar.
Pasi doli nga SPAK pas gati dy orësh, Berisha deklaroi se i bën përshtypje fakti se e njëjta prokurori ka deklaruar publikisht se nuk ështe e nevojshme thirrja e tij para organit të akuzës, ndryshe nga sa ka ndodhur sot.
Shkëlzen Berisha është pyetur sot edhe në lidhje me shënimin ‘Për Shkëlzenin’, pikërisht një faksi të Ministrisë së Drejtësisë në të cilin është përmbajtja e letrës miratuese nga Ministria e Drejtësisë për kontratën që do të lidhej në Gërdec, një kopje të së cilës nga zyra e Aldo Bumçit e cila pretendohet se i është dërguar privatisht Shkëlzen Berishës. Shkëlzen Berisha tha se s’ka asnjë lidhje me këtë letër të falsifikuar dhe i kërkon Prokurorisë që të zbulojë kush e ka shkruar.
“S’kam asnjë lidhje me të. Prokuroria duhet t’i thotë publikut se kush e ka bërë atë shënim. Unë nuk kam asnjë lidhje. Prokuroria t’i thotë publikut se e kujt është kaligrafia, nëse nuk është falsifikim. Që unë të futem në Ministrinë e Drejtësinë nuk do të thotë që unë marr vendime”, tha ai.
Ai u pyet nëse ndihet i rrezikuar për këtë çështje duke u përgjigjur shkurtimisht: “Aspak”!
“Jam thirrur për tu pyetur si person që mund të ketë lidhje me rrethanat e hetimit për çështjen e Gërdecit. Ato që thashë në SPAK i kam deklaruar dhe publikisht. Nuk mendoj se deklaratat e mia i kanë dhënë asnjë ndihmë hetimit në fjalë sepse nuk kam pasur lidhje. Mendoj që pa diskutim prokuroria duhet të thotë se e kujt është kaligrafia. Unë ia thashë pa diskutim se duhet ta gjeni se kujt i përket nëse nuk është falsifikim“- tha Shkëlzen Berisha.
