Tre bashki në Jug të vendit që janë lënë si zona të lira për aleatët dhe nuk u përfshinë në procesin e Primareve të PD, edhe zyrtarisht do të jenë në dorën e PBDNJ-së.
Kreu i PD-së Sali Berisha ditën e sotme ka firmosur një marrëveshje bashkëpunimi me Vangjel Dulen e cila do të çojë opozitën drejt fitores në zgjedhjet lokale të 14 majit.
“Shpreh kënaqësi për nënshkrimin e marrëveshjes. Është një bashkëpunim i hershëm me PD, dhe në shumë drejtime i suksesshëm. Do të veçoja bashkëpunimin në vitet 2005-2009, është nga katërvjeçarët më të suksesshme të qeverisjes në vend. Kjo marrëveshje nënshkruhet në kushtet ku demokracia në vendin tonë janë në intubim. Me të gjitha risqet që një gjendje e tillë klinike përfshin edhe organizmin e shtetit.
Rruga është e gjatë dhe e vështirë, por na garanton fitore. Synojmë që të sjellim kandidaturat më të denja për komunitetin. Primaret ishin një risi dhe një realitet i pakthyeshëm, që duhet të shënojë aktivitetin e çdo force politike.
Së dyti, ne do të sjellim programe konkrete, për çdo komunitet, programe të cilat do ofrojnë zgjidhje për problematikat lokale. Së treti, bashkëpunimi ynë dhe forcat e tjera opozitare, do të sjellim më 14 maj në çdo derë mesazhin se ata und të ndryshojnë fatin e tyre”, deklaroi Dule.
