Kreu i grupit parlamentar i Partisë Socialiste, Taulant Balla bëri me dije se brenda kësaj jave mazhoranca qeverisëse do të bëjë kallëzimin në SPAK për dosjen e “21 janarit” pasi, sipas tij, kanë dalë prova të reja për ngjarjen e rëndë ku humbën jetën 4 protestues.
Pyetje: Njoftuat një kallëzim apo padi të re në SPAK për 21 janarin, çfarë ka ndodhur?
“Kam deklaruar dje se PS ka thirrur protestën e 21 janarit, që 4 dëshmorët janë një prej nesh. Ne jemi palë e dëmtuar. Bazuar në faktin që dosja penale për vrasjen e Aleks Nikës është një dosje që gjendjet ende në Prokurorinë e Tiranës, kështu që në orët dhe ditët në vijim edhe PS do të ketë kallëzimin e vetë. Punën do t’ia lëmë ekspertëve që ta mbarojnë edhe këtë moment që flasim që po merren me formalizimin e këtij kallëzimi të ri. Iu kam thënë që nga 21 marsi kur ka qenë kallëzimi i parë, në çdo moment i kam kërkuar drejtuesit të SPAK se përse nuk e heton SPAK masakrën e 21 janarit”, tha fillimisht Balla.
Pyetje: Çfarë u diskutua në mbledhjen e grupit parlamentar?
“Në mbledhjen e grupit u mblodhëm për seancën plenare për ndryshimet në buxhet, kur përmes pakos së madhe do u vihet në ndihmë pensionistëve”, tha Balla.
Pyetje: A ka afat për amnistisë fiskale?
“Nuk ka ardhur ende në Kuvend, sapo të vijë do të informoheni, e dini që nuk kalon me procedurë të përshpejtuar”, tha Balla.
Në këtë demonstratë, e cila u organizua nga Partia Socialiste u qëlluan për vdekje Hekuran Deda, Ziver Veizi, Faik Myrtaj dhe Aleks Nikaj.
