Prej ditësh Lezha është përfshirë nga moti i keq dhe reshjet e dendura të shiut kanë shkaktuar përmbytje.
Banorët thonë se dëmi që është shkaktuar është i pallogaritur, ndërsa shprehen se askush nuk pyet se çfarë ndodh pas kësaj situate e cila përsëritet çdo vit.
“Nuk vjen kush për të na parë se çfarë na ka ndodhur në këtë situatë. Dëmi është i pallogaritur se janë 5 dylym ullinj në ujë. Llogarite sa e ka koston një ulli për tu blerë dhe për tu vjelur, edhe për të shkuar në 4-vjeçar. Janë hapur kanale dhe uji në vend se të kalojë 400 metra, shkon 1 km e gjysmë me dal në kanalin kryesor”, tha njëri nga banorët.
Kujtojmë që i gjithë territori i vendit vijon të jetë i përfshirë nga reshje shiu si dhe reshje bore në relievet malore mbi 600 metër.
Priten reshje mesatare deri lokalisht intensive në qarqet Shkodër, Kukës, Vlorë dhe Gjirokastër, ndërsa në qarqet e tjera priten reshje mesatare.
Reshjet priten të shoqërohen edhe me shtrëngata në qarqet Shkodër, Vlorë dhe Gjirokastër.
