Gjykata Kushtetuese ka shqyrtuar sot kërkesën e Partisë Demokratike për mandatin e deputetes Olta Xhaçka.
Seanca ka nisur prej orës 10:00 të paradites dhe ka përfunduar vetëm pak minuta më parë, ndërsa në shqyrtim ishin dy kërkesa, një e grupit të Alibeajt dhe një e “Rithemelimit”. Kushtetuesja në përfundim të seancës së sotme është tërhequr nga vendimi, i cili pritet të shpallet brenda 30 ditëve.
Opozita pretendon se deputetja Xhaçka është në konflikt të hapur interesi, sepse kompania e bashkëshortit të saj, pra edhe ajo vet, kanë përfituar pasuri publike shtetërore, gjatë investimit në një objekt turistik.
Sipas PD, bashkëshorti i ministres, Artan Gaçi ka përfituar të drejta pasurore mbi pasuri shtetërore – një kompani e Gaçit ka fituar statusin e investitorit strategjik dhe të drejtën e shfrytëzimit të një sipërfaqe plazhi në bregdetin e jugut – dhe në këtë formë përfitimet e Gaçit konsiderohen si përfitime dhe të vetë ministres. Kështu, sipas PD, Xhaçka është në konflikt interesi dhe duhet të shkarkohet si deputete e Kuvendit.
