Deputetja e PD-së, Ina Zhupa shprehet se ka vetëm një Parti Demokratike dhe ajo është e gatshme të fitojë zgjedhjet vendore të 14 majit.
Gjate intervistes në Syri TV, Zhupa tha se vetëm Edi Ramës i intereson përçarja në mënyrë që të mos rrezikojë pushtetin qendror dhe atë vendor.
“Shumica e grupit parlamentar të PD e ka kuptuar lojën që bëhet për interesat e Edi Ramës. Unë vazhdoj t’i mëshoj faktit që nuk është asgjë tjetër veçse vullneti i Edi Ramës për të mbajtur opozitën në këtë ngërç, në këtë lloj përçarje. PD në bazë, në takime, në struktura, në primare, në pjesëmarrje që kishin qytetarët në primare në zgjedhjet e kandidatëve, ka vetëm një PD dfhe është e unifikuar dhe është gati për të fituar zgjedhjet. kjo i dhemb Edi Ramës dhe përdor çdo vegël, kushdo qoftë, në çdo moment për t’i shërbyer qëllimit të tij, për të mos u kontrolluar, për të mos i dalë aferat dhe mbi të gjitha për të mbajtur pushtetin lokal dhe atë qendror. Kjo lloj përçarje i shërben edhe në komisionet parlamentare. Se po të keni parasysh, në seancë 10 minuta kohë ka deputeti për të folur për një çështje të caktuar edhe atëherë kur na e japin këtë 10 minutësh, se edhe atëherë e bëjnë ca të nënës ca të njerkës, ca 20 minuta, ca 2. Por në komisione nuk ka limit për kohën, nuk ka limit për çështjet, për pyetjet. Sepse jeta e vërtetë parlamentare në çdo parlament të botës bëhet në komisione ku ti ke kohën të merresh me ekspertizën në fusha të caktuara, me kulturën, arsimin, çështjet e rinisë. Kur na mohohet edhe kjo, atëherë përballja është e vetmja rrugë dhe atë do të bëjmë”, tha Zhupa.
