Edhe nëse Skuka qëndron, Partizani është në kërkim të një sulmuesi qendre, që do të ishte alternativë e vlefshme për një sezon të gjatë. “Panorama Sport” mëson se Etien Tare, djali i Igli Tares, ka refuzuar mundësinë për t’u transferuar te Partizani.
19-vjeçari shihet si një lojtar interesant dhe premton shumë, teksa aktualisht është pjesë e Rapidit të Vienës, ku aktivizohet më së shumti me ekipin e dytë.
Babai i tij, njëkohësisht drejtor sportiv i Lacios, ka qenë dakord me këtë transferim, por ka qenë vetë Etieni, i cili ka anuluar gjithçka, të paktën për momentin.
Nga ana tjetër, mësohet se për shërbimet e tij është vënë në lëvizje Tirana, që e vlerëson mjaft qendërsulmuesin dhe është gati ta afrojë në huazim 6-mujor, për ta bërë përfundimisht të vetin në verë, kur i skadon kontrata me austriakët./Panoramasport
