Regi Lushkja është shumë pranë kthimit në Kategorinë Superiore, një vit pas largimit drejt Moldavisë. Mesfushori i talentuar kërkon që të luajë më rregullisht se sa te Sherif Tiraspol dhe duket se e ardhmja e tij do të jetë në kryeqytet.
Tirana kishte gjetur një akord me futbollistin dhe parimisht, ishte shumë pranë firmës me të. Por “Panorama Sport” ka mësuar se gjatë ditës së sotme, pasi është mësuar se bardheblutë ishin shumë pranë akordit me lojtarin, ka ndërhyrë në garë fuqimisht Partizani.
Të kuqtë kërkojnë prej kohësh një lojtar me tiparet e Lushkjes, i cili arrin të kryejë të dy fazat e lojës në mesfushë, për të kompletuar edhe më shumë këtë repart në një sezon ku synimi është vetëm titulli kampion. Ata kanë nisur kontaktet me lojtarin dhe përfaqësuesit e tij, duke bërë që për momentin të mos arrihej firma e futbollistit kavajas me Tiranën dhe duke mbajtur peng transferimin e tij në radhët e bardhebluve.
