I premtoi dy vjet më parë por vetëm sot kryeministri Edi Rama konfirmon se satelitët e kërkuar me ngulm prej tij “Albania 1 & 2”, të cilët i kushtuan buxhetit të shtetit 6 milionë dollarë janë nisur për në hapësirë.
Rama përmes një video live në “Facebook” ku monitorohet lëshimi i raketës “Falcon 9”, që është misioni i përbashkët i SpaceX Transporter 6, zbulon se njëherësh transporton për në hapësirë edhe satelitët, “Albania 1” dhe “Albania 2”.
Lëshimi i dy staelitëve në hapësirë vjen në një periudhë të vështirë për shqiptarët, atëherë kur kriza ekonomike dhe çmimet e larta të karburantit dhe energjisë kanë goditur fort çdo familje.
Tenderi për të kompletuar ëndrrën e Ramës për “të prekur” hapësirën u hap në fillim të shtatorit nga Agjencia e Mbrojtjes Civile dhe kompania fituese u shpall “Satellogic USA” Inc, e cila prodhon mikrosatelitë që sipas qeverisë do monitorojë “frikshëm” tokën shqiptare.
Nevojën e këtyre dy satelitëve Rama e shikon të lidhur me situatën e dështimit të përpjekjeve për të eliminuar ndërtimet pa leje, pasi më parë në takimet e tij publike është shprehur se syri nga 150 km do zbulojë shkelje me kullat, të cilat tashmë nuk do të mund “t’i shpëtojnë” më qeverisë.
Dy satelitët pritet të monitorojnë Shqipërinë nga lartësitë, me një precizion të lartë dhe qartësi të plotë figure deri në 75 cm2.
“Satelitët e ALBANIA 1 dhe ALBANIA 2/ Shqipëria do të ketë përdorim ekskluziv të tyre, për përpunimin e Informacionit Gjeohapësinor (GIS) si dhe ofrimin e produkteve të imazherisë dhe komponentëve të tjerë të saj, e një sërë institucioneve e subjekteve, publike ose private, puna e të cilave lidhet me territorin, ujërat, pyjet, zjarret, mbetjet urbane, prodhimin bujqësor, zhvillimin urban, titujt e pronësisë, e me radhë”, shkruante Rama në Facebook në shtator.
Pavarësisht se satelitët e Ramës u ngjitën tashmë në hapësirë, plani i Ramës ishte shtyrë disa herë, pasi vetë kryeministri tha në tetor 2021, se do të lëshoheshin në hapësirë në muajin mars të 2022.
Afatet kaluan me disa muaj, por qeveria tashmë ka satelitët që sipas saj do të sigurojnë një kontroll më efikas mbi territorin, e madje do të arrijnë sipas Ramës të prodhojnë efikasitet në furnizimin 24 orë me ujë të vendit.
“Jo vetëm dronat, dronat po e po, satelitët në mënyrë që kontrolli mbi territorin, mbi trafiqet, kontrolli mbi kufijtë, kontrolli mbi gjithçka të kalojë në nivelin e teknologjisë dhe të hiqet nga duar e atyre që kontrollojnë me sy që në atë pikë nuk është se dallojnë shumë me njëri-tjetrin. Kur vjen puna inspektorët aty me virus janë edhe ata që kishit ju edhe ata që kemi pasur ne, ata kanë virusin nuk diskutohet. Sa më shumë t’i heqim atyre kontrollin e jetës së bizneseve, e jetës së vendit aq më mirë do jetë. Prandaj sytë për të kontrolluar do t’i çojmë në qiell dhe do i kontrollojmë nga qielli. Po sikur tu them unë se uji 24 orë lidhet edhe me satelitët, çfarë do të më thoni ju? Të gjitha bashkë. Meqë nuk kemi ujë 24 orë në gjithë territorin, kjo nuk do të thotë se nuk duhet ta kontrollojmë territorin, kjo është e gabuar. Përmes satelitëve dhe dronëve do të kemi një kontroll mbi lumenjtë e vendit dhe do të identifikojmë çdo ndërhyrje mbi ta dhe shtretërit e tyre”, tha Rama gjatë një fjalimi në parlament më 14 Tetor.
