Brenda dy ditësh, nga Elbasani në Vlorë, janë djegur qëllimisht disa makina luksoze dhe një biznes. Mesa duket, “mesazhet e urimit të Vitit të Ri” po merren në mënyra paksa të pazakonta në këtë fundvit.
Disa mjete luksoze janë djegur gjatë natës së sotme në rrugën “Ymer Peni” në lagjen Skënderbej në Elbasan. Persona ende të paidentifikuar i kanë vënë zjarrin bagazhit dhe për pasojë, mjetet janë djegur.
Magazina ku ndodheshin mjetet ruhej nga një kompani private me kamera sigurie dhe alarm, të cilin dyshohet se e kanë çaktivizuar para se t’i vinin zjarrin objektit.
Po prapë, gjatë natës së sotme i është vënë flaka një makine pranë zonës së Lungomares në orën 04:00. Mjeti është djegur pjesërisht për shkak të lajmërimit në kohë të zjarrfikses.
Ngjarja dyshohet sërish se ka qenë e qëllimshme.
Një natë më parë, në Vlorë iu vu zjarri qëllimisht tri automjeteve të një biznesi dhe u tentua të digjej edhe një dyqan shumice mallrash industriale së bashku me makinën e pronarit të dyqanit. Në këtë rast autori u identifikua dhe është shpallur në kërkim.
Në pamjet e publikuara nga Boldnews.al vihet re se ngjarja ka qenë e qëllimshme. Dy persona me kapuç në kokë dhe bidonë me benzinë në duar afrohen të qetë te automjetet e parkuara, i spërkasin dhe më pas i vënë flakën. Menjëherë dy personat shihen duke u larguar me shpejtësi.
Mjetet janë në pronësi të Zamir Kormuzit, bizesmen në qytetin e Vlorës. Bizesmeni dyshon për zjarrvënie për shkak të konkurencës.
