Gjykata e Apelit Durrës ka lënë në fuqi vendimin e Gjykatës së Shkallës së Parë Elbasan, që lejon ekstradimin në Turqi të Faruk Fatih Özer.
Në seancën e sotme të drejtuar nga gjyqtari Valbon Çekrezi, u miratua vendimi i shkallës së parë mbi çështjen e bosit të kriptomonedhave.
Ndërkohë, Özer nuk ishte i pranishëm në seancë, as avokati i tij, ndërsa e pranishme ishte avokatia e caktuar nga gjykata për çështjen në fjalë. Sipas gjykatës, për vendimin e sotëm të apelit, mund të bëhët rekurs në Gjykatën e Lartë të Shqipërisë.
Ozer u arratis në prill të 2021, dhe më pas u bë me dije se ai kishte udhëtuar në katër shtete të ndryshme, përfshi edhe Shqipërinë ku dyshohet se fshihej për një kohë.
Në verën e këtij viti, pas më shumë se një viti qëndrim në Shqipëri, bosi turk i kriptomonedhave u arrestua në Palasë nën shoqërinë e një vajze dhe personave të tjerë me orgjinë shqiptare.
Organi i akuzës në Turqi ka kërkuar plot 40,564 vite burg për Faruk Ozer dhe 20 punonjësit e tjerë të kompanisë “Thodex”, të cilët u larguan pas falimentimit me paratë e vjedhura nga mbi 700 mijë qytetarë, dhe besohet se shkojnë në mbi 2 miliard dollarë.
