Në një kohë që Presidenti ka dekretuar 14 majin e vitit 2023 si datë për mbajtjen e zgjedhjeve të ardhshme vendore, qeveria që në ditët e para të janarit do të nisë shpërndarjen e miliarda lekëve për disa kategori.
Përmes rrjeteve sociale, kryeministri Edi Rama bën me dije se qeveria që ai drejton është gati të shpërndajë 8 miliardë lekë, ku sqaron se këto para do të shkojnë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit.
Kujtojmë që vendimi i Edi Ramës për të shpërndarë 8 miliardë lekë vjen këtë fillim viti të ri duke u munduar që të “blejë” mendjen e qytetarëve të cilët pas rreth 4 muajsh do t’i drejtohen kutive të votimit për zgjedhjet lokale.
Njoftimi i kryeministrit Edi Rama:
“Gëzuar! Qeveria po mbyll Pakon e Madhe në mbështetje të 1 milionë individëve, për të lehtësuar ndjeshëm daljen e familjeve shqiptare nga ky dimër i ngarkuar, duke zeruar efektin e inflacionit të luftës mbi konsumin bazë për pensionistët, familjet në ndihmë ekonomike, posaçërisht nënat kryefamiljare në skemën e ndihmës ekonomike, paraplegjikët, tetraplegjikët, personat me aftësi të kufizuara, invalidët e punës, po edhe për punonjësit e shtetit – duke dhënë më shumë për ata që fitojnë më pak, por pa lënë askënd pa mbështetje.
Pakoja e Madhe, e cila parashihet mbi 8 miliardë lekë në dorë për të gjithë individët e përfshirë, do të mbyllet brenda ditës së sotme dhe do të shpërndahet e gjitha në ditët e para të janarit.
Kjo është qeveria e shumicës, jo e disave dhe faktet e shifrat thonë se volumi i mbështetjes financiare të atyre që fitojnë më pak apo të shtresave në nevojë, në vitet e qeverisjes sonë (pa llogaritur fondet masive të Rindërtimit pas tërmetit apo të Luftës me pandeminë) është disafish më i lartë se sa në tërë qeveritë e mëparshme të marra së bashku.“, shkruan Rama.
