Kryetari i PD Lulzim Basha i është kundërpërgjigjur sulmit të kryeministrit në vazhdën e debatit për mediat që ka nisur së fundmi ndërmjet tyre.
“Edi Rama si nje censurues i dobët shtrembëron qëndrimet e mija për mediat, – deklaroi Basha në mesditë. – Nuk ka dhe nuk ka për të patur kurrë sulm timin kundër gazetarëve. Ka patur dhe do të ketë kritika për ata pronarë që nuk lejojnë gazetarët të raportojnë te vërtetën,- ka theksuar ai në Fb, pak pasi Rama komentoi disa deklarata të tij gjatë protestës para kryeministrisë.
“Nga publicisti i dikurshëm Edi Rama nuk ka mbetur asgjë, – shprehet Basha më tej. – Ai tani është një autokrat i zhytur në korrupsion, drogë dhe krim, që sulmon gazetarët dhe mbron e promovon kriminelët. Vreri dhe urrejtja që ai nxjerr përditë kundër gazetarëve, bën kontrast jo vetëm me pazaret dhe favoret për disa nga pronarët e medias, por në vecanti me mbrojtjen dhe kujdesin që shpreh me fjalë e me vepra për Roshët dhe Tahirët me shokë.
Krimi, korrupsioni dhe kapja e shtetit janë problemet që po e shkatërrojnë Shqipërinë. Gazetarët që ngrenë zërin kundër tyre dhe i kërkojnë llogari kryeministrit, i shërbejnë njerëzve dhe të ardhmes së vendit. Zëri i tyre duhet mbrojtur, zërit të tyre duhet t’i bashkojmë zërat tanë për të denoncuar dhe ndalur të keqen.”
