Një borxh prej 500 eurosh duket se është burimi i një sherri mes kushërinjve në Kamzë, të cilët mbrëmjen e djeshme u përleshën me thika në një dasëm ku ishin të dy të pranishëm.
Fatjon Luca plagosi me thikë kushëririn e tij Hafuz Troci.
Gjatë konfliktit morën dëmtime të lehta edhe familjarët e dy palëve në konflikt, shtetasit M. L., B. C., dhe një 15-vjeçar. Të dëmtuarit ndodhen në spital, jashtë rrezikut për jetën.
“Më datë 25.12.2022, në Bathore, në lagjen nr. 6, gjatë një konflikti për motive të dobëta, shtetasi F. L., ka goditur me mjet prerës kushuririn e tij, shtetasin H. T. Gjatë konfliktit kanë marrë dëmtime të lehta dhe familjarët e dy palëve të konfliktit, shtetasit M. L., B. C., dhe një 15-vjeçar”, njoftoi policia.
Mësohet se sherri ka nisur ka nisur pas një borxhi që i plagosuri i ka pasur autorit të ngjarjes Fatjon Luca.
Ky i fundit i ka thën hetuesve se 500 eurot që ia kishte dhënë Hafuz Trocit nuk i kishte marrë ende. Sipas tij, ai ia kishte kërkuar disa herë, por Troci nuk ia kishte dhënë.
Konflikti i djeshëm nisi teksa ata ishin të pranishëm të gjithë së bashku në një dasmë. Në përfundim të ceremonisë, Luca është afruar dhe e ka qëlluar në gjoks Hafuz Trocin. Në sherr janë përfshirë edhe familjarët e tjerë të Trocit dhe Lucës, të cilët kanë nisur të qëllojnë njëri-tjetrin me grushte.
Pas mbledhjes së provave në vendin e ngjarjes, policia ka arrestuar autorin Fatjon Luca, ndërsa po hetohen në gjendje të lirë personat e tjerë të përfshirë.
