Esin Hakaj, mbrojtësi i majtë i Vllaznisë, në takimin ndaj Teutës ishte autori i golit të parë, në fitoren e thellë të Vllaznisë. Vetë Hakaj më tepër se goli i shënuar, i është gëzuar rikthimit të Vllaznisë te fitorja. Ky ishte goli i dytë i mbrojtësit në këtë sezon, pasi atij ndaj ekipit të Kukësit në transfertën verilindore.
Në një intervistë për “Panorama Sport”, ai ka folur edhe për situatën dhe atë që beson për vazhdimësinë. Pavarësisht se është një “ish” i Partizanit mëngjarashi kërkon që 2023- shin ta nisë me një fitore ndaj të kuqve.
Shënuat golin që i hapi rrugën një fitoreje të thellë. Sa i lumtur jeni?
Normalisht që çdo gol të jep emocione, kur shënon vetë apo kur shënon ekipi, përherë ndihesh mirë. Normalisht që kur shënon vetë, se ne mbrojtësve na ndodh më rrallë, kemi më shumë kënaqësi. Nuk u mendova dy herë për ta goditur topin dhe kur pashë që përfundoi në rrjetë, normalisht që u gëzova, sepse po ndihmoja skuadrën. Gjithsesi, të jem i sinqertë më shumë jam gëzuar për faktin që morën tri pikë të rëndësishme për vazhdimësinë.
A ishte një fitore e lehtë kjo ndaj Vllaznisë?
Përballë kishim një skuadër, e cila kishte bërë mirë në ndeshjet e fundit dhe me një trajner si Edi Martini, që njeh mirë edhe lojën e Vllaznisë, e dinim që nuk do ta kishim të lehtë. Fatmirësisht falë asaj ndërhyrjeje të Zogoviçit dhe atij largimi të topit nga ana ime, nuk u ndëshkuam në momentet e para, sepse gjithçka do të na ishte vështirësuar. Pastaj erdhën golat dhe loja jonë vazhdoi gjithnjë e në rritje.
A mund të kishit bërë më mirë se vendi i pestë pas 15 javësh?
Mendoj se po. Më vjen keq, sepse kemi lënë disa pikë, që nuk duhet të ishin lënë. Megjithatë, edhe kemi arritur të marrin disa pikë me shkallë të lartë vështirësie. Por sërish jam i mendimit se duhet që të ishim më lart dhe duhet që të kishim më shumë pikë.
Keni qenë një nga ekipet më të penalizuara nga mungesat për arsye dëmtimesh. Sa kanë ndikuar në rezultat?
Normalisht që të gjithë lojtarët kanë vendin e vet dhe padyshim që ndihet mungesa e njërit apo e tjetrit. Gjithsesi, ne jemi një ekip dhe të gjithë që janë aktivizuar, kanë bërë më të mirën e mundshme.
Riktheheni në janar përballë Partizanit, ku keni qenë pjesë. Si e prisni?
Është një përballje ndryshe, sepse kam qenë për tri vite pjesë e Partizanit. Kam kaluar sezone të bukura dhe kam përjetuar shumë emocione aty. Por dua të them se tani jam me ekipin tim të zemrës dhe si profesionist, unë kërkoj që të bëj maksimumin me Vllazninë. Këtë do të kërkoj që ta bëj edhe ndaj Partizanit dhe pse jo të nisim vitin 2023 me një fitore në këtë përballje.
Partizani është 7 pikë larg, si e shikoni luftën për titull?
Është ende herët për të folur për titullin, por jam i bindur se pavarësisht kësaj diference momentale, ne do të jemi në luftë për kreun deri në fund.
Në 2022-shin patët edhe thirrjet tuaja të para me Kombëtaren. Çfarë ndiet?
Ishin emocione të bukura. Të jesh pjesë e Kombëtares është një vlerësim dhe përgjegjësi e madhe. Shpresoj që edhe në vitin që vjen të kem sërish ftesa të tilla.
Keni një urim në këtë prag festash?
U uroj të gjithë shqiptarëve gëzuar festat e fundvitit! U uroj sidomos tifozëve tanë të mrekullueshëm, stafit drejtues, stafit teknik dhe të gjithë shokëve të ekipit, të kenë vetëm gëzime! Uroj me shpirt që pas Kupës që morëm këtë vit, në 2023-shin të ngremë lart trofeun e titullit kampion.
