Komisioni i Pavarur i Kualifikimit njoftoi këtë të Enjte vendimin e konfirmimit në detyrë të prokurorit të Lushnjes, Elion Mustafaj.
Procesi i tij i vetingut u kryhe nga trupa e përbërë nga Valbona Sanxhaktari kryesuese, Olsi Komici anëtar dhe Firdes Shuli, relatore.
Elion Mustafaj e ka nisur karrierën në sistemin e drejtësisë si kancelar në prokurorinë e Durrësit. Ai është emëruar prokuror në vitin 2012 dhe e ka ushtruar funksionin në Prokurorinë e Korçës, atë të Vlorës si dhe në prokurorinë e Lushnjes.
Gjatë seancës dëgjimore të zhvilluar të Mërkurën, Elion Mustafajt iu kërkuan shpjegime kryesisht sa i përket kontratave kontradiktore për blerjen e një apartamenti në Yzberisht Tiranë. Mustafajt po ashtu iu kërkuan shpjegime për bilance negative prej rreth 700 mijë lekësh në total, ndërsa u vlerësua pozitivisht sa i përket profesionalizmit dhe figurës.
Prokurori, nga ana e tij, vlerësoi procesin dhe falënderoi trupën. Ai këmbënguli se kontradiktat në dy kontratat ishin gabime, por edhe se kishte dhënë shpjegime që vërtetonin pohimet e tij. I pyetur nga vëzhguesi ndërkombëtar Theo Jacobs mbi faktin se kishte firmosur kontrata përmbajtja e të cilave nuk përputhej me realitetin, Mustafaj tha se kishte qenë një gabim. “I mirëkuptoj dyshimet tuaja,” tha ai, ndërsa përsëriti se bëhej fjalë për një gabim.
