Seanca maratonë që pritet të zgjasë dy ditë dhe është e fundit në Kuvend për vitin 2022 ka nisur vrullshëm me debate dhe përplasje të forta mes mazhorancës dhe opozitës.
Në rend të ditës janë disa vendime dhe projektligje të rëndësishme, ndër të cilët veçojmë projektvendimin për emërimin e një anëtarët të Gjykatës Kushtetuese, atë për zgjedhjen e Avokatit të Popullit, për emërimin e një anëtari të bordit të ERE-s, apo ndryshimet në Kodin Rrugor.
Pikërisht vendi vakant në Gjykatën Kushtetuese, për të cilën Komisioni i Ligjeve nën drejtimin e mazhorancës i ka dërguar Kuvendit tre emra (Marjana Semini, Arta Vorpsi, Ardian Dvorani), ku më i përfoluri është ish-kreu i Gjykatës së Lartë, ka qenë ai që ka ndezur debatin mes deputetit Oerd Bylykbashi dhe kreut të Grupit të Ps, Taulant Balla.
Balla duket se nuk ka lënë deputetët e PS, por e ka marrë vetë në orë “aksionin” për mbrojtjen e Dvoranit përballë kritikave të ashpra të opozitës, duke e cilësuar “kampion në luftën ndaj korrupsionit”.
Reagimi i fortë i Ballës erdhi pasi deputeti demokrat Oerd Bylykbashi tha se Dvorani është një kandidat që vepron kundër ligjit dhe se ia ka komunikuar vetë Edi Rama kritikën për futjen e emrit të tij në listën për Gjykatën Kushtetuese.
“Çështja e dytë është për kandidatin e Gjykatës Kushtetuese. ëshët një kandidat, i cili ka qenë prokuror dhe ka kërkuar burg për ata që kërkuan lirm nga komunizmi. Është një kandidat që vepron kundër ligjit. I kam thënë që atë ditë kryeministrit, kë po bëni gati të sillni në Gjykatën Kushtetuese”, tha Bylykbashi
Balla u mbrojt duke thënë se Dvorani është vlerësuar nga SHBA-të dhe është një nga emrat e ndershëm të sistemit të drejtësisë.
“Sekretari i non-gratës duhet ta lajë gojën 100 herë para se t’i zërë emrin në gojë kampionit të antikorrupsionit të shpallur nga Blinken. Foltorja e ka kusht ta sulmojë një gjyqtar të ndershëm si Ardian Dvorani. Por është joetike që në fillim të seancës, kur nuk kemi shkuar ende tek ajo çështje. Kur kompetenca e kuvendit nuk është aspak të hyjë në një process që e ka bërë KED”, tha Balla.
