Nazer Seiti njëri nga njerëzit e konsideruar nga prokuroria e Katanias në Itali, si anëtar i bandës së drejtuar nga Moisi Habilaj dhe i arrestuar në Shqipëri mbetet në burg. Gjykata e Tiranës ka vendosur të pranojë sot kërkesën e prokurorisë për të ashpërsuar masën e arrestit ndaj tij nga arrest me burg për 20 ditë, në arrest me burg.
Seanca u ndërpre për disa minuta, pasi avokati kërkoi kohë për t’u njohur me provat, por gjykata u mjaftua me dosjen e kopsitur të prokurorisë.
Prokurori ka pretenduar se Nazeri është përgjuar në makinë (përgjime ambientale) me dhjetëra herë, ndërsa një provë e fortë për ta lënë pas hekurave ishte një bisedë me Moisi Habilajn për të liruar nga burgu një mikun e tij me nofkën “Maloku” dhe përmendnin një shifër prej 200 mijë eurosh.
“Kam 200 mijë ku t’i fsheh”, dëgjohen ata në një moment, e më pas, siç tha prokurori në seancë, kanë dyshuar se mos përgjoheshin dhe kanë çmontuar të gjithë tapicerinë e makinës. Këto lekë sipas prokurorit, do përdoreshin për lirimin e mikut të tyre me nofkën “Maloku” të kapur më kuadër në operacionin policor “Odesa” në vitin 2012.
Kujtojmë se më herët Seiti ka shfaqur vullnetin për tu ekstraduar në Itali, ku kërkon të përballet me akuzat e trafikimit të drogës nga Shqipëria në drejtim të Italisë. Por pavarësisht këtij vullneti, gjykata e Tiranës nuk e mori parasysh.
