Masa e sigurisë “arrest me burg” është dhënë nga Gjykata e Tiranës për Marjeta Karaj dhe Gazmend Ngota, dy personat që së bashku me të birin e 56-vjeçares, Besmir Karaj, i morën jetën në mënyrë makabre 61-vjeçarit Menduh Kurt-Deda.
Krimi i rëndë që ndodhi në vitin 2017 në Kodër Shupal, nuk është pranuar në gjykatë nga Marjeta Karaj, por ka qenë shoku i të birit që e ka fundosur drejtuesin e fondacionit për fëmijët jetimë të ushtarakëve të rënë në detyrë.
56-vjeçarja, bashkë me të birin, Besmir Karaj, që është në kërkim, dhe shokun e tij Gazmir Ngota kishin kontaktuar në zonën e Xhamllikut, Kurtdedën, i cili fshihej prej kohësh.
Ai kishte pasur më parë një lidhje intime me Marjetën dhe njëherësh kishte një borxh të pashlyer ndaj saj në vlerën e 1 milionë lekëve të rinj.
Për këtë arsye Besmir Karaj dhe Ngota e kanë marrë me forcë atë në automjet, dhe kanë shkuar në zonën e Alliasit, ku e kanë dhunuar.
Më pas të dy e kanë transportuar Menduh Kurt–Deda, në një zonë pyjore, në vendin e quajtur “Kodër Shupal”, ku pasi e kanë lidhur me zinxhir dhe e kanë lyer me lëndë djegëse benzinë e kanë djegur për së gjalli 61-vjeçarin, pavarësisht lutjeve të tij për t’u ndalur.
