Një 48-vjeçare që ka mbajtur detyrën e drejtoreshës në organet e OSHEE-së në të shkuarën dhe rezultonte në kërkim për korrupsion, është vënë në pranga nga Policia e Tiranës.
Mësohet se Albana Ferraj, e cila ka qene drejtoresha e Divizionit Tregtar dhe njëherazi shefe e kabinetit të administratorit të OSHEE, Ardian Çela, akuzohet nga SPAK për korrupsion dhe marrje ryshfeti në vlerën e 131 mijë eurove.
Sipas SPAK, drejtoresha e Divizionit Tregtar, Albana Ferraj ka përfituar 131 mijë euro nga kompania italiane përmes krijimit të një marrëdhënieje fiktive, duke përdorur edhe një kompani tjetër me seli në Shqipëri.
“Ferraj e ka fshehur origjinën e shumës monetare që ka përfituar, edhe pse e dinte që ky veprim përbente vepër penale”, thuhet në kërkesën e SPAK, që e akuzon atë edhe për “pastrim të produkteve të veprës penale”.
Njoftimi i policisë:
Strukturat e DVP Tiranë, në vijim të punës për goditjen e paligjshmërive, kanë hartuar një plan masash në kuadër të të cilit janë zhvilluar kontrolle të befasishme në ambiente të ndryshme që mund të frekuentohen nga persona të shpallur në kërkim, me qëllim kapjen dhe vënien e tyre përpara përgjegjësisë penale.
Shërbimet e Komisariatit të Policisë Nr. 2. kanë kapur shtetasen A. F., 48 vjeçe, banuese në Tiranë, e shpallur në kërkim pasi Prokuroria e Posaçme Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Korrupsioni pasiv i personave që ushtrojnë funksione publike” dhe “Pastrimi i produkteve të veprës penale ose veprimtarisë kriminale”. 48-vjeçarja dyshohet se ka marrë shumën 131 mijë euro si rryshfet, për të favorizuar një kompani italiane, për një tender të zhvilluar në vitin 2016.
