Ceremonia e mbylljes së periudhës 1 vjeçare për Tiranën si Kryeqyteti Europian i Rinisë në “Ditën Kombëtare të Rinisë” nuk ka shkuar siç duhet për kryetarin e bashkisë Erion Veliaj.
Teksa Veliaj ngjiste shkallët e Pallatit të Kongreseve për të hyrë dhe mbajtur fjalën e tij në këtë ceremoni, një grup të rinjsh kanë protestuar me thirrje përkundrejt tij.
“Erion Veliaj boll me propagandë, rinia me gomone – ju me Oligarkë!”, ishte thirrja që të rinjtë e Organiztaës Politike i drejtuan në kor kryebashkiakut të Tiranës.
Në momentin që grupi i të rinjve protestues ka tentuar t’i afrohet kryebashkiakut, rojet e sigurisë kanë ndërhyrë duke i shtyrë dhe kërkuar që të ndalin thirrjet e tyre.
Kujtojmë se protesta ndaj Veliajt vjen në një kohë që kryebashkiaku pretendon në takimet e tij se Tirana është kthyer në një qendër tërheqëse për të rinjtë (edhe të huaj), por në krahun tjetër mijëra të rinjë shqiptarë kanë braktisur vendin në mungesë të alternativave të punësimit dhe “shpresave të shuara” në vend.
