Duke e konsideruar një aksion të mirëorganizuar shtetëror e policor, kreu i Partisë së Lirisë Ilir Meta zbuloi detaje nga momenti i sulmit të Gerti Shehut ndaj kryedemokratit Sali Berisha.
Meta, i cili ndodhej në krahun e majtë të Berishës teksa po marshonin së bashku drejt podiumit të protestës së sotme të opozitës tha se autori 31-vjeçar Ishte kamufluar si një anëtar i ekipit të mediave që raportonin për tubimin.
“Shumë shpejt Rama do detyrohet të nxjerrë edhe kartelën e tij që e mban të fshehur për të lehtësuar situatën e tij përballë atyre që ka bërë. Në rastin konkret, duke qenë se isha në atë moment, mund të them që kemi të bëjmë me një aksion të mirëplanifikuar, aksion të mirëorganizuar shtetëror e policor, person kontingjent i policisë, siç e tregoi edhe Berisha, i kamufluar si pjesë e ekipit mediatik që shoqëronte protestën, e që në një moemnt të caktuar bëri të gjitha veprimet në mënyrë profesionale e me një gjakftohtësi profesionale. Aksion i Ramës dhe policisë së tij. Rama i pabesë e burracak, ka shkelur çdo kod moral që ka rregulluar në shekuj bashkëjetesën. Nuk mund të justifikohet me asnjë kartelë që i ruan t’i përdorë në të ardhmen për të lehtësuar gjendjen e tij”, tha Meta.
Ai u ndal edhe te vetëpërmbajtja që tregoi opozita duke mos kaluar perimetrin e sigurisë të vendosur për të ruajtur rendin e punimeve të Samitit BE-Ballkani Perëndimor, duke shprehur vlerësimin maksimal për qytetarët në shesh.
“Sot opozita tregoi se ka vizionin dhe vetëpërmbajtjen e qëndrueshmërinë për ta shporrur këtë sekt kriminal që shkatërron bashkëjetesën me shqiptarëve, që përdhos Kushtetutën e të drejtat e qytetarëve, që bllokon për vite të tëra integrimin për interes të bandave ndërkombëtare. As miliardat e as dhuna nuk do ti bëjë derman përballë vendosmërisë së opozitës së bashkuar në triumfin e lirisë, të demokracisë e të shtetit të së drejtës”, theksoi Meta.
