Liderët e BE-së zbarkojnë në Tiranë këtë të Martë në kuadër të samitit BE-Ballkani Perëndimor, ndërkohë që opozita proteston.
Në Samit do të jenë Presidentja e Komisionit Europian Ursula Von Der Leyen, Presidenti i Këshillit Europian Charles Michel, Presidenti i Francës, Emmanuel Macron, Kancelari i Gjermanisë, Olaf Scholz, por edhe Kryeministri i Hungarisë Viktor Orban, një kritik i politikave të BE-së.
Ndërkohë, Policia e Shtetit ka kaluar në gatishmëri duke shtuar masat e sigurisë. Në kuadër të masave për mbarëvajtjen e sigurisë do të bllokohen plotësisht disa rrugë, kryesisht në kryeqytet dhe do vendoset një perimetër sigurie, që nisi aktivizimin në datën 5 dhjetor në orën 14:00.
Ndalimi i qarkullimit për automjetet dhe ndërprerja e qarkullimit të autobusëve urbane e vështirëson qarkullimin për qytetarët.
Krahas samitit, do të zhvillohet edhe protesta, e thirrur nga Partia Demokratike. Kreu i PD, Sali Berisha ka thënë se protesta do të mbahet në orën 12:00 para Kryeministrisë, në Bulevardin “Dëshmorët e Kombit”, ku po ashtu sipas Policisë, do të jetë i bllokuar nga “Sheshi Nënë Tereza” deri të ura e Lanës pranë ish-hotel Dajtit.
Kreu i PD-së Berisha ka deklaruar se populli opozitar do të mbushë rrugët dhe sheshet e Tiranës. Ai ka theksuar se protesta do jetë paqësore dhe një mundësi e mirë për të njohur Europën me gjendjen e vërtetë në Shqipëri. Skenari i protestës është lënë mister nga opozita.
