Policia greke ka arrestuar në Kostur një çift grekësh (burrë e grua) pasi gjatë kontrollit u janë gjetur dhe sekuestruar 3 çanta dhe 2 thasë që përmbanin 58 pako me 66 kg 160 gram marijuanë.
Hetimi zbuloi se droga kishte destinacion Selanikun dhe pritës i mallit ishte një grek 51 vjeç, ndërsa droga mësohet se vinte nga Shqipëria.
Gjatë kontrollit të banesës së tij u gjetën dhe sekuestruan 10 pako me 11 kg 380 gram marijuanë dhe 2 qeska me 852 gram marijuanë, 1.34 gram kokainë, 4 peshore, grirës hashashi dhe 5 ilaçe me përbërës për të cilët do të kryhet ekspertizë.
Prej muajit nëntor në zonën e Greqisë Perëndimore, që përfshin zonën Kostur, Kozani, Selanik janë evidentuar 7 raste ku janë kapur në total rreth 253 kg marijuanë që dyshohet se vinin nga Shqipëria dhe ku janë arrestuar disa shtetas shqiptarë.
Zakonisht në këtë zonë ngarkesat e drogës vijnë nga kufiri i Qarkut të Korçës.
