Mëngjesin e kësaj të hëne është zhvilluar në ambientet e Presidencës shorti për të zgjedhur anëtarët e rinj të Këshillit të Emërimeve në Drejtësi.
Fiona Papajorgji, Altin Binaj, Sandër Simoni dhe Arqilea Koça janë 4 emrat që janë zgjedhur deri tani si anëtarët e rinj të Këshillit të Emërimeve në Drejtësi për vitin 2023.
Duke qenë se ligji parashikon që në rastin kur një anëtar i Gjykatës së Lartë bëhet pjesë e KED, ai zgjidhet automatikisht kryetar, tashmë do i takojë gjyqtarit Sandër Simoni që të marrë drejtimin e këtij institucioni të drejtësisë.
KED është një organ kolegjial, i përbërë nga 9 anëtarë me një mandat 1 vjeçar dhe është përgjegjës për vlerësimin e kritereve profesionale e morale të kandidatëve për anëtarë të Gjykatës Kushtetuese dhe për Inspektor të Lartë të Drejtësisë.
Korumi i KED plotësohet me 2 anëtarë që zgjidhen nga Gjykata Kushtetuese, 1 përfaqësues i Gjykatës së Lartë, 1 përfaqësues i Prokurorisë së Përgjithshme, 2 përfaqësues nga Gjykatat e Apelit, 2 përfaqësues të Prokurorive të Apelit, 1 përfaqësues nga Gjykatat Administrative.
Anëtarët e zgjedhur të KED ushtrojnë detyrën për një mandat njëvjeçar, që fillon në datën 1 janar të çdo viti kalendarik.
ANËTARËT E PËRZGJEDHUR:
Gjykata Kushtetuese:
Fjona Papajorgji dhe Altin Binaj – Vitore Tusha (anëtare zëvendësuese)
Gjykata e Lartë:
Sandër Simoni – Albana Boksi (anëtare zëvendësuese)
Prokuroria e Përgjithshme:
Arqilea Koça – Alma Muça (anëtare zëvendësuese)
Gjykatat e Apelit:
Fuat Vjerdha dhe Engert Pëllumbi – Genti Shala (anëtar zëvendësues)
Prokuroritë e Apelit:
Arta Marku dhe Gjon Fusha – Moisi Duda (anëtar zëvendësues)
Gjykatat Administrative:
Enerjeta Shehaj (Deraj) – Elda Vrioni (anëtare zëvendësuese)
