Kryeministri Edi Rama u vendos në vështirësi sot nga gazetarët teksa në bashkëbisedimin për Samitin BE-Ballkani Perëndimor u pyet për skandalin me grabitjen e 2.4 miliardë eurove nga 200 mijë qytetarë europianë, prej një rrjeti call-centerash me bazë në Shqipëri.
Rama u gjende përballë pyetjes se a është favorizuar dhe mbrojtur aktiviteti i paligjshëm i grabitjes përmes Bitcoin, të të shpallurit në kërkim nga Spanja, Amant Josifi vetëm se ka lidhje të ngushta me qeverinë dhe është ortak i Olsi Ramës.
Dhe ashtu siç zakon e ka shefi i qeverisë u përpoq të hiqte përgjegjësinë nga vetja, duke thënë se përgjegjësia është personale dhe se vëllai i tij është një person adult.
Pavarësisht kësaj, Rama e mori në mbrojtje vëllanë, duke thënë se është bërë padrejtësisht pjesë e valles së shpatave, pasi për akuzat e hedhura në drejtim të tij nuk ka asnjë lloj baze.
“Sa i përket sjelljes në valle të emrit të tim vëllai kjo është pjesë e valles së madhe të shpatave të politikës. Dhe nuk ka absolutisht asnjë lloj baze. Nëse do të kishte pasur mbështetje shtetërore, personazhi për të cilin flasim nuk do të ishte në kërkim”, tha Rama.
Duke qenë se mediat spanjolle flasin për një ish-këshilltar të Ministrisë së Mbrojtjes së Shqipërisë që menaxhonte rrjetin e mashtrimit nëpërmjet call-centerave, Rama u përpoq të largonte përgjegjësinë nga qeveria, duke thënë se urdhër-arresti për Josifin është lëshuar në bashkëpunim nga Policia Shqiptare dhe Europoli.
“Qeveria jonë nuk është mburojë e asnjë aktiviteti dhe nuk i bëhet mburojë aksujt. Por për të ardhur te rasti konkret këto spekulime të natyrës që një ish-zyrtar, janë të pavlera. Sepse e para ky ish-zyrtar është në kërkim nga drejtësia dhe kjo kërkesë nuk është bërë nga organet ligjzbatuese spaniolle në mënyrë të pavarur por në bashkëpunim me organet tona ligjzbatuese, ku kam parasysh policinë e shtetit që është në ombrellën e ekzekutivit. Nuk ka pasur absolutisht dhe nuk kanë për askënd asnjë lloj pengese dhe asnjë lloj ndikimi për të mos ndikuar”, deklaroi Rama.
Pavarësisht se kryeministri e mohoi lidhjen midis vëllait të tij dhe Amant Josifit në këtë skemë mashtrimit, që çoi në zbarkimin e Gardës Civile spanjolle, Europol dhe Eurojust më 8 dhe 9 nëntor në Elbasan, Vlorë e Tiranë, faktet tregojnë se Olsi Rama dhe 30-vjeçari në arrati kanë qenë ortak të pandarë nga 2014 deri në 2018 në këtë industri të paligjshme.
