Me një postim të minutave të fundit në rrjetin social Facebook, kryedemokrati Sali Berisha ka zbuluar sloganin e protestës që është thirrur nga Partia Demokratike dhe do të zhvillohet më 6 dhjetor në bulevardin “Dëshmorët e Kombit”.
Selia blu ka zgjedhur që frazën endemike shqiptare “Bukë e krypë, e zemër!” ta përshtatë në versionin e ri si për të treguar korrupsionin si virtytin më të madh të qeverisë mikëpritëse të Samitit BE-Ballkani Perëndimor, pra qeverisë së korruptuar të Edi Ramës.
“Bukë, kripë dhe… korrupsioni i përzemërt i Ramës”, është slogani që opozita shqiptare do të përdorë për të mirëpritur liderët e Bashkimit Europian dhe për t’u treguar të vërtetat e keqqeverisjes së “Rilindjes”.
“#ProtestDecember6 Protestojmë të gjithë bashkë, 6 dhjetor, ora 12:00, Bulevardi “Dëshmorët e Kombit”, shkruan Berisha duke e bërë të qartë edhe vendin pavarësisht se Policia e Shtetit e ka vendosur bulevardin kryesor brenda perimetrit të sigurisë në planin e masave që ka hartuar për mbarëvajtjen e rendit gjatë Samitit, që është historik për Shqipërinë.
“Evropa sipas rrugës së drejtë, jo rrugës së Ramës”, është një tjetër mbishkrim që plotëson sloganin e zgjedhur nga opozita për tubimin në fjalë.
