Një grup ultrasish të tifozëve të Romës kanë sulmuar mbështetësit e Chelsea sonte në mbrëmje para takimit që dy skuadrat do të luajnë për “Champions League” në “Stadio Olimpico”. Fatmirësisht asnjëri prej tyre nuk ka pësuar lëndime serioze.
Tifozët anglezë po pinin në një lokal pranë koloseut ku ultrasit romanë me fytyra të mbuluara dhe me kapela u futën papritur brenda. Duke mbajtur shkopinj ata sulmuan tifozët anglezë të cilët erdhën në kryeqytetin italian për ndeshjen e Ligës së Kampionëve, raporton “roma today”.
Disa tifozë të Bluve të Londrës u lënduan dhe këta tifozët ultras ikën menjëherë nga lokali, duke dëmtuar po ashtu edhe lokalin.
Policia arriti në vendin e ngjarjes shpejt dhe po shikon kamerat e sigurisë për të identifikuar dhunuesit. Policia në Romë ka konfirmuar se dy anëtarë të grupit “Ultras Fedayn” janë arrestuar.
Incidenti rikujton sulmin e tifozëve të Lazios ndaj atyre të Tottenhamit, ku dy tifozëve italianë u është ndaluar për pesë vjet hyrja në stadiume.
