Ambasadorja e Shteteve të Bashkuara të Amerikës, Yuri Kim ka postuar sot një foto me këngëtaren Dua Lipa e cila do të mbajë mbrëmjen e sotme një koncert në Tiranë me rastin e 28 Nëntorit
Në një postim në Instagram, Kim u shpreh se është e lumtur për të uruar qytetaren më të re të Shqipërisë për Pavarësinë e Shqipërisë.
“E lumtur për të uruar qytetaren më të re të Shqipërisë dhe e emocionuar për koncertin e Dua Lipës sonte për të festuar 110 vjetorin e Pavarësisë së Shqipërisë”, ka shkruar ambasadorja e SHBA.
Presidenti Bajram Begaj i dha shtetësinë shqiptare Dua Lipës. Begaj priti dje artisten e mirënjohur dhe vlerësoi talentin e saj, shpirtin artistik si dhe angazhimin e saj në mbështetje të kauzave sociale.
“Është kënaqësi e veçantë që sot presim artisten e madhe Dua Lipa. Them artiste e madhe, por ajo është edhe një vajzë e thjeshtë, që krenarinë më të madhe na e ka dhënë ne, Shqipërisë, Kosovës dhe kudo ku ka shqiptarë nëpër botë. Rinia shqiptare ju ka shembull dhe ju keni treguar se ëndrrat arrihen duke punuar gjithnjë e më shumë. Ti i ke bërë të gjithë shqiptarët bashkë! Ndaj kam kënaqësinë t’ju jap shtetësinë shqiptare”, u shpreh Begaj.
Lajmi për nënshtetësinë e Lipës ka pushtuar të gjitha mediat vendore, dhe jo vetëm. Tabloidet kryesore përreth botës kanë shkruar për ngjarjen e djeshme, pasi Lipa nuk ka hezituar që lajmin ta ndajë edhe me miliona ndjekësit e vet në Instagram, duke publikuar fotografi nga ceremonia zyrtare e betimit të Duas në Tiranë.
