Kim Jong-un mund të ketë zgjedhur vajzën e tij si trashëgimtare, thonë ekspertët, pasi ajo u shfaq me diktatorin e Koresë së Veriut në publik për herë të dytë brenda një kohe të shkurtër.
Ju-ae, e cila mendohet të jetë 10 vjeçe, u fotografua duke buzëqeshur me babain e saj teksa shpërblente shkencëtarët dhe zyrtarët ushtarakë përgjegjës për ndërtimin e një rakete bërthamore të re.
Kjo është hera e dytë brenda një jave që ajo u fotografua para raketave.
Ankit Panda, një eksperte në Korenë e Veriut me Carnegie Endoëment for International Peace, tha se imazhet ‘goditëse’ sugjerojnë që Ju-ae ‘po pozicionohet si një pasardhëse e mundshme e pushtetit’.
Lajmi i parë për ekzistencën e saj doli nga basketbollisti amerikan në pension Dennis Rodman, i cili krijoi një miqësi me Kim në fillimet e sundimit të tij.
Rodman, i cili vizitoi Korenë e Veriut disa herë përpara se miqësia e tij me Kim të prishej, kujtoi takimin me një nga fëmijët e diktatorit në vitin 2013.
Sportisti tha se ai kaloi kohë ‘duke pushuar buzë detit’ me Kim dhe gruan e tij, Ri Sol-ju, dhe u lejua të mbante vajzën e tyre të vogël, që ai tha se quhej Ju-ae.
Spiunët e Koresë së Jugut kanë thënë më parë se fëmija më i madh i Kim, që tani mendohet të jetë 12 vjeç, është një djalë – edhe pse asgjë tjetër nuk dihet për të dhe ai nuk është parë kurrë në publik.
Fëmija më i vogël besohet të jetë një vajzë, e lindur rreth marsit 2017.
Paraqitja e papritur e Ju-ae së bashku me të atin dhe armët bërthamore të Koresë së Veriut duket e llogaritur për të projektuar një imazh fuqie – si për popullin koreano-verior ashtu edhe për botën.
Përshkrimi i medias shtetërore për të si fëmija ‘më i dashur dhe më i çmuar’ i Kim-it jep gjithashtu aludime të forta se ajo është e preferuara për ta pasuar atë.
“Kjo sigurisht që është befasuese. Fotografia e Kim Ju Ae duke qëndruar përkrah babait të saj ndërsa po festohej nga teknikë dhe shkencëtarë të përfshirë në lëshimin e fundit të ICBM do të mbështeste idenë se ky është fillimi i pozicionimit të saj si një pasardhëse e mundshme. Mediat shtetërore që nënvizojnë dashurinë e babait të saj për të, e nënvizojnë më tej këtë”, shtoi ajo.
