Një 53 vjeçar nga Korça ra në prangat e policisë greke, pasi po transportonte me një automjetë me targa shqiptare 6 kg heroinë.
Policia e Shtetit shqiptar në sqarimin e saj thotë se droga u kap në makinën me targa shqiptare në Portin e Igumenciës në Greqi.
Sipas policisë shqiptare sasia prej 6 kg heroinë u gjet e fshehur në sediljet e pasme të makinës, që drejtohej nga një 53-vjeçar nga Korça, por me dokumenta greke.
“Me datë 27 tetor 2017, në portin e Igumenicës, nga kontrolli që ju bë mjetit tip “BMW”, me targa AA 301 GR me drejtues mjeti shtetasin Th.T, 53 vjeç, lindur në Korçë, i cili dispononte dokumenta greke, në pjesën e pasme të sedileve poshtë portobagazhit në një vend të fshehtë të bërë enkas, Policia greke gjeti rreth 6 kg lëndë narkotike e llojit heroine”, informon policia shqiptare.
Gjithashtu policia sqaron se “Nga shkëmbimi i informacionit me palën greke, rezulton se lënda narkotike është ngarkuar në Shkup, Maqedoni dhe automjeti me lëndën narkotike nuk ka hyrë në territorin shqiptar por ka hyrë në Greqi, nga PKK Evzone Selanik.”
Ndërkohë destinacioni i lëndës narkotike, sipas të dhënave hetimore ishte Bari në Itali.
