Partia Demokratike mbetet e vendosur që me 6 dhjetor të mbushë sheshin në kryeqytet.
Shefi i Organizimit në Partinë Demokratike Klevis Balliu tha se përkundër qëndrimit të policisë protesta do të bëhet dhe sytë e gjithë botës do të jenë aty.
Balliu: Protesta është institucioni më i vyer në sistemin demokratik. Protesta bën diferencën mes diktaturës dhe lirisë. Ne jemi populli i lirisë paçka se Edi Rama kërkon të vendosë një regjim ku nuk lejohen protestat. Por nuk e pyet njeri as Edi Ramën as policinë e Edi Ramës. Protesta do të bëhet, do të jetë me 6 dhjetor, do të jetë një protestë e jashtëzakonshme, e cila do të shikohet nga e gjithë bota.Gjithë qytetarët janë të mirëpritur të vijnë atje dhe të bashkohen me një popull të tërë pro europianë, pro procesit të Berlinit dhe kundër projekteve të Putinit, Ramoviçit dhe Vuçiç për të garantuar që Shqipëria të kthehet në shinat e demokracisë, perëndimit, integrimit.
Gjate intervistes per Ora News, Balliu konfirmoi se demokratët e shohin 6 dhjetorin, ditën kur liderët europianë dhe ata të rajonit do zbarkojnë në Tiranë për Samitin BE-Ballkani Perëndimor, si një mundësi për ta “zhveshur lakuriq” kryeministrin para tyre.
Balliu: Po ndjekim këshillën që ka dhënë BE. Do të jetë një protestë paqësore e jashtëzakonshme, një protestë informuese në një shkallë të paimagjinuar. Do jenë 1000 gazetarë, do të jetë në të gjitha mediat e botës. Do informohet çdo kancelari e botës për të vërtetën që ky nuk është një vend i varfër. Ky është vendi më i pasur me popullin më të varfër dhe qeveritarët më të pasur të rajonit. Pjesëmarrja do të jetë e jashtëzakonshme, kryesisht Tirana. Ajo protestë do kthejë shpresën, do ketë produkt. Produkti është ballafaqimi i Edi Ramës përballë të vërtetës në sytë e mbarë botës dhe liderëve europianë. Kur të shkojë atje dhe tu flasë për incineratorët do ti thonë se incineratorë nuk kishe ti. Kur të shkojë të kërkojë fonde do ti thonë që ti i vjedh fondet. Nuk janë fondet për të blerë vila ky, Balluku, e Veliaj.
Mes shumë aferave qeveritare, ish-deputeti u ndal te ajo e portit të Durrësit.
Balliu: 28 mln euro grante tërhoqi BE për shkak të aferës korruptive të portit të Durrësit, e cila shkel Marrëveshjen e Stabilizim Asocimit, de facto shkatërron integrimin e Shqipërisë në BE. Pse? Për të mbushur xhepat Edi Rama, për të bërë pallate Edi Rama me Olsi Ramën, Erion Veliaj dhe gjithë banditët që përfaqësojnë. Kemi 10 vjet që njëherë në 3-4 muaj del një kryetar bashkie i lidhur me filan kartel droge, njëherë në tre muaj del një polic që ose vret një qytetar ose vjedh një qytetar.
Në fund, ai kujtoi datën dhe orën e takimit me qytetarët kundër keqqeverisjes.
Balliu: Me 6 dhjetor ora 12:00 sheshi do të jetë plot si kurrë më parë në sytë e mbarë globit, çdo media botërore do të njihet e vërteta se Edi Rama po bën genocid duke shpopulluar vendin, që Edi Rama vjedh qytetarët shqiptarë çdo ditë, që Edi Rama vjedh fondet e BE, që Edi Rama jep 430 mln euro për tre incineratorë dhe dy nuk ekzistojnë fare dhe njëri nuk punon.
