Drejtori i Policisë së Tiranës, përmes një shkrese zyrtare, refuzon kërkesën e Partisë Demokratike për të protestuar para kryeministrisë.
Opozita ka lajmëruar një protestë që nis në mesditë më 6 Dhjetor, kur zhvillohet edhe samiti i BE-së në Tiranë, ndërkohë që kreu i PD-së Sali Berisha ka theksuar se protesta do të jetë paqësore.
Më herët gjatë ditës, në një konferencë për mediat, Berisha la të kuptohet se përgjigja e policisë për protestën ishte negative. “Cila është përgjigja? Ajo që dikton Edi Rama, që bëri gjithçka dhe kujtoi se me këtë rast, do shfrytëzojë samitin për të shtypur liritë dhe të drejtat e popullit opozitar, ne e kishim parashikuar, prandaj thirrëm protestë”, tha Berisha, duke konfirmuar edhe vendosmërinë për zhvillimin e protestës.
Kreu i PD-së ka deklaruar se qëllimi i kësaj proteste është ti tregohet BE-së cilat janë problemet e shqiptarëve.
Referuar shkresës së kreut të Policisë së Tiranës drejtuar PD-së, thuhet se sheshi para kryeministrisë ku PD kërkon të protestojë është pjesë e perimetrit të sigurisë që do të ngrihet me rastin e samitit të BE-së.
Më tej thuhet, se “zhvillimi i tubimit brenda këtij perimetri sigurie pengon zhvillimin normal te Samitit dhe përbën një rrezik real për sigurinë kombëtare dhe sigurinë publike”.
Lorenc Panganika i sugjeron PD-së ta zhvillojë protestën në një tjetër lokacion, “jashtë perimetrit të sigurisë.”
