Moti i keq që ka përfshirë vendin prej fillimit të kësaj jave, ka goditur sot edhe qytetin bregdetar të Vlorës.
Reshjet e dendura të shiut që shoqërohen me erëra të forta kanë bërë që Kapiteneria e Portit të Vlorës të pezullojë lundrimin e anijeve të vogla deri në përmirësimin e kushteve atmosferike.
Siç raportohet dallgët arrijnë nga 1.8 deri në 3.5 metra duke e bërë të rrezikshme lëvizjen në det.
“Kapiteneria e Vlorës njofton të gjithë drejtuesit e anijeve të peshkimit dhe mjetet e vogla lundruese për situatën e përkeqësuar dhe të merren masat për sigurimin e mjeteve dhe parandalimin e ngjarjeve dhe situatave gjatë datave 22-23 nëntor 2022”, thuhet në njoftim.
Ndërkohë, anijet e transportit ndërkombëtar detar vazhdojnë të operojnë normalisht. Përmirësimi i situatës meteorologjike në gjirin e Vlorës pritet të ndodhë këtë mbrëmje, pas orës 19:00.
