Deputeti Saimir Tahiri ka mbërritur në Prokurorinë e Krimeve të Rënda për të dëshmuar në kuadër të hetimeve për implikim në trafik droge me grupin Habilaj.
Prokurori Besim Hajdarmataj, i cili javën e kaluar kishte kërkuar autorizim nga parlamenti për arrestimin e ish-ministrit të Brendshëm, ka ftuar Tahririn për të dëshmuar në Prokurori. Ftesa i është dorëzuar Tahirit ditën e djeshme kur 4 oficerë të Policisë Gjyqësore kontrolluan shtëpinë e tij në Tiranë.
Atij nuk iu gjet asgjë në shtëpi që t’i shërbejë hetimit, por ish-ministri i Brendshëm është thirrur të japë shpjegime për implikimin e emrit të tij në grupin kriminal të Habilajve. Gjithashtu nga deputeti socialist kërkohet që të sqarojë edhe njëherë në prokurori mënyrën se si ka shitur automjetin e tij tek personat nën hetim siç janë vëllezërit Habilaj.
